حبيبي يا خلك مو مثل باقي الناس
محبوب العمر صدكوني سميته
من اول نفس حبيته حد الموت
لان مو بالكلب بالريه ضميته
يوج ابروحه نار او حته احسّن بيه
اوعله هذا الطبع من زغري ماشيته
ماساكن ابعيد او حته احنن ليه
بفراشي ينام او بيدي غطيته
اشفافي امعوده من عطره تاخذ حيف
وابصدري الغميج ابحركه شميته
يمر ليل الشته واتسامر انه اوياه
يحجي اوياي سكته او سكته حاجيته
اذا ابتعد عنه ابروحي تصعد نار
لان هو ثلج بحشاي حسيته
صح وي هالعشك لامتني كل الناس
اوترس اذني الحجي واللوم سمعيته
كالولي حبيبك طبع بيه غدّار
او كلمن عاشره تنهلك عافيته
كتلهم اريده او مشتهي بلواه
اومثل ماي الصواني ابروحي باريته
كالولي حبيبك تالي حبه العوز
ياهو العاشره بيه ينهجم بيته
كتلهم صعب ما اصبر ابلياه
خلوهه علّي تنكلب تاليته
كالو كبلك اشجم واحد انغر بيه
لان مو صادقه وي اليحب نيته
كتلهم شريجي ابليل عمري الفات
اشلون الماي يكدر ينسه ساكيته
كالو مايفيدك شلك بالله اوياه
واليمشي ابطريجه الدنيه عاميته
كتلهم ابد ما اعوفه لو للموت
الشمع هو ابحياتي او انه صينيته
كالو بيه مغثه او صوت تالي الليل
عمي الجربه خل يرأف ابريته
شاعر كلت انه او بيه اصوغ اشعار
من دونه القلم يعثر ابقافيته
كالو من تطيح اتشمت العذّال
لان تابوت موتك انت دكيته
كتلهم اذاحان الاجل وياي
او جسمي ينشمر باحضان شبليته
اريدن عالكبر تنكتب هالكلمات
هالميت تره كتلاه باكيته
************************************
